Lestrarsprettur og lukkupottur

Dagana 2. - 13. desember fór fram lestrarsprettur í Heiðarskóla. Fyrir hverjar 30 mínútur sem nemendur lásu  í yndis- og heimalestri settu þeir snjókorn og jólakúlur í gluggana. Fyrir sama fjölda mínútna gátu þeir skilað inn lestrarlukkumiðum sem dregið var úr í dag. Dregið var úr potti hvers aldursstigs og úr þeim komu nöfn þriggja nemenda. Á yngsta stigi var sú heppna Vigdís Halla Rúnarsdóttir, á miðstigi Daði Rafn Falsson og á því elsta Lilja Bergmann Tryggvadóttir. Í lestrarlukkuvinning voru tveir bíómiðar og bók og voru krakkarnir að vonum glaðir.

Lestrarmetnaðurinn var mjög mikill hjá nemendum og er gaman að sjá hversu mikið hefur ,,snjóað" hjá okkur í Heiðarskóla.  Ákveðið var að telja saman fjölda miða sem var skilað inn og segja tölurnar meira en mörg orð.  

1. - 3. bekkur las í 413 klukkustundir

4. - 6. bekkur las í 516 klukkustundir

7. - 10. bekkur las í 278 klukkustundir

Samtals lásu því nemendur í 1207 klukkustundir eða í rétt rúma 50 sólarhringa.  Geri aðrir betur.

Foreldrar eru eindregið hvattir til að vekja athygli barna sinna á nýútkomnum bókum. Í Krakkafréttum má til að mynda fylgjast með skemmtilegri bókaumfjöllun.